殺！殺！殺！…你搶我奪，咱走怹逐，毋是沙鹿種場，卻拼佮切齒嚼牙，強要拆食落腹。大へ！你懸懸惦頂頭蓋好肚量，拜託高抬貴手，放阮下跤手一條生路，咒誓從今以後剃頭出家做和尚，毋要續佇甲你阿姆阿伯自找死路，阿門、阿彌陀佛……

哈！哈！哈！…你正才調會當娶三妻四妾，風神榜通人知，爻人毋免四界去放送，自然有狗仔遮前擱追後。哪親像阮憨慢講話小聲嗽，一位某就強要顧袂著，是買按怎狗蟻甲大象比，爛鳥比豬腿。

呸！呸！呸！...有錢有地位啥米了不起？差人袂輸假若咻奴才，恁爸忍夠久矣，強買凍袂著，有一工下時拵咧娘，等我大樂透對著三五億，一定佮你比落，續落挑工駛免鑢到您兜去囂掰。

奶！奶！奶！…阿娜答你哪這久攏無看，害阮病相思走去看先生，伊講已經無藥通治囉，啊你按算學歌仔戲彼位陳世美是否？將某囝絕情絕義來放推，儂阮毋敢肖想遮呢高調啦！但是最起碼每個月糧草你嘛要照起工，算盤撾來小嗲へ：攏總年頭到年尾掛利息算你一百五十萬，帖來。

喂！喂！喂！…老仔仔你嘛卡差不多咧！剉屎攏愛寫一掛有的無的，毋是摻黃色就是練痟話，卒的台語害人看甲霧沙沙，若無便是搖頭擺尾唱之乎者也，時常展成語、撂文言典籍，當作你學問蓋深嘎？吃兩把應菜就想要攀就天…啊莫怪電小二對你無趣味：「你的文章已登上聯合新聞網首頁…」對你來講根本無可能，卡早睏卡有眠咧啦！